السلام عليكم ورحمة الله وبركاته

اتذكر في الجامعه كنت ارسل لنفسي ايميلات بالملفات والمستندات اللي احتاجها عشان اطبعها
اتذكر اني نسيت الفلاش ميموري في البيت وفيه ملفات الواجبات واخذت زيرو في الهووموورك
اتذكر اني ضيعت الفلاش ميموري ولا عندي نسخه منه
اتذكر اني لما احتاج ملفات في كمبيوتري الشخصي في البيت لازم ادق على احد في البيت يدخل الكمبيوتر  ويرسل الملفات وانا خايف يطيح على فضايح في كمبيوتري خخخخ
اتذكر اني كنت مستانس على الفايلر حق الجامعه بس ماحد يستخدمه الا انا ماقدر اعطي الباسوورد حقي احد عشان

كل هذا ما عاد اسويه لأني طحت على خدمة

Live Mesh

Live Mesh

خدمة من مايكروسوفت تعتبر جديدة في بداياتها لسا بـيـتا

تسمح للمستخدم بأن يقوم بعمليه تزامن ومشاركة الملفات بين الاجهزة مهما كان نوعها بكل سهوله وسرعه ( الخدمة حتى الان لاتدعم الا اجهزة اللاب توب والاجهزة المكتبيه وقريبا سوف يتم دعم اجهزة الماكنتوش والهواتف النقاله)

مميزة جداّ تجمع ثلاث خدمات رئيسية للتعامل مع الملفات طبعا كل الكمبيوتر ملفات ومجلدات

التزامن
المشاركة
الاتصال

الفلاش ميموري حقي اللي مستانس فيه 8 جيجا ماعاد احتاجه
خليته للديفيدي بلاير اشغل فيه اغاني وافلام خخخخ

نرجع لموضوعنا … رح احاول اشرح بعض الخطوات للاستفاده من هالخدمه

التزامن

الخدمة توفر لك سطح مكتب افتراضي على الويب يشبه لحد كبير نظام ويندوز فيستا
وهذي صورة له

بالاضافة الى امكانية ربط اجهزة PC أخرى بحسابك
لو اضفت ملفات ومجلدات داخل سطح المكتب هذا رح تطلع لك في الاجهزه المتصله طبعا تقدر تحدد مين تطلع عنده ومين ما تطلع عنده
ولو عدلت والا حذفت في اي مكان رح يطلع التعديل في الاماكن الباقية
كأنك تلعب بملف واحد بسس هنا وهناك وهناك

طبعا والعكس صحيح بحيث انك تحدد مجلدات عندك في لابتوبك وتخليها مربوطه بسطح المكتب هذا للتزامن

المشاركة

الانترنت كله صار مشاركة

مشاركة مواضيع مشاركة صور والحين مشاركة مجلداتك وملفاتك
خدمة لايف ميش خلتها أسهل عشان تشارك ربعك واخوياك الملفات حقتك وتعطيهم صلاحيات تعديل أو اضافة أو حذف أو بس قراءة
والطريقة انك تقوم بدعوتهم لمشاهدة محتويات المجلد حاليا اظن ما يدعم الا 5 دعوات
وكل التعديلات اللي يسوونها تطلع عندك في News

الاتصال

وهذي أحسن ميزة في هالخدمه بالنسبة لي

تعرفون الاتصال بسطح المكتب البعيد ؟ Remote Desktop connection

هذي خدمة الاتصال بسطح المكتب البعيييييد مررره

تخليك تدخل كمبيوترك من أي مكان فعليا وتستخدمه كما لو كنت عليه فعلا << أموت على العربي

مادري وش اشرح في هالنقطة لأني اظنها مفهومه وهذي صورة لها

طبعا ما تحتاج برامج  عشان تستخدم هالميزه بس يبيلك انترنت اكسبلورر وتثبت الـ ActiveX اللي يطلبه منك لايف ميش

طريقة تثبيت واستخدام لايف ميش

التثبيت

1- ادخل الموقع http://www.mesh.com/

2- اضغط على Sign In

3- ادخل الايميل والباسوورد تبع الايميل

4- وافق على الاتفاقية

5- ادخل Live Desktop سطح المكتب الافتراضي رح تلاقيه فاضي

تقدر تضيف مجلد  بالضغط على Create new folder  مرتين  وفي المجلد ترفع الملفات اللي تبيها من جهازك

عشان تضيف كمبيوترك للمجموعه حقتك لازم تثبت البرنامج عليه

1- اضغط  على Devices فوق رح يرجعك للصفحة الرئيسية للخدمه

2- اختر Add Device

3- اختر نظام التشغيل

4- حمل الملف وتبته على جهازك من Install

5- بعد ما تنتهي من تثبيته ويشتغل البرنامج معك استخدم نفس الايميل اللي دخلته في الموقع  وهو رح يضاف لقائمة الاجهزة حقتك في الموقع

الاتصال بسطح المكتب

1- في قائمة الاجهزه اختر الجهاز

2- اضغط Connect أو أضغط عليه مره ثانيه

3- رح تفتح معك صفحة جديدة تبث الـ Active  يمكن يطلع لك شريط اضغط عليه بعدين اختر Install ActiveX Control

4- اضغط Install

5- بعد ما يتثبت استمتع بالتجربة لما تسوي Connect  على جهازك

طبعا مارح يقبل معك اذا كنت على نفس الجهاز

وش رايكم في الخدمه ؟:)